Fréttir

Leiðsögumennirnir okkar - Guðrún Ingibjörg

Leiðsögumennirnir okkar - Guðrún Ingibjörg

Leiðsögunemar hafa skipað stóran sess í starfsemi Endurmenntunar undanfarin ár. Sumir hafa komið reglulega til okkar á Dunhagann og sótt kennslustundir en fjölmargir hafa stundað námið erlendis frá eða af landsbyggðinni í gegnum fjarnámsbúnað.

Einn þáttur i náminu er að fara í ferðir um fallega landið okkar. Nemendur fá þannig tækifæri til að nýta fræðin úr kennslustofunni og tengja þau við einstaka staði á ferð um landið ásamt því að þjálfa sig í leiðsögn. Það hefur ávallt myndast góður andi og sterk tengsl í hópunum sem eiga eflaust eftir að endast um ókomna tíð.

Fjölmargir leiðsögumenn útskrifaðir frá Endurmenntun eru nú á ferð og flugi um landið með erlenda ferðamenn. Við erum stolt og ánægð með að hafa menntað fullgilda og hæfileikaríka leiðsögumenn sem eru verðugir fulltrúar þeirra sem kynna land og þjóð.

Við ákváðum að hafa samband við nokkra fyrrum nemendur og heyra hvað þeir hafa haft fyrir stafni eftir útskrift. Við byrjum á Guðrúnu Ingibjörgu Hálfdánardóttur.

Hvaða ár útskrifaðist þú sem leiðsögumaður frá EHÍ?
Í janúar 2014

Starfar þú sem leiðsögumaður í dag? 
Ég var byrjuð að starfa sem ökuleiðsögumaður fyrir námið og hef haft það sem hlutastarf með kennslu og jógakennslu. Ég stofnaði nýlega ferðaskrifstofuna Eilífðarsól ehf. sem sérhæfir sig í jógaferðum og þar nýtist leiðsögunámið vel því ferðirnar eru blanda af jóga og ferðalögum.

Sérhæfir þú þig í sérstökum ferðum?
Ég hef verið verktaki og tek eiginlega allt sem býðst. Stundum er ég sitjandi leiðsögumaður, stundum ökuleiðsögumaður í millistærð af rútu og stundum hef ég tekið jeppatúra, ég er vön akstri á upphækkuðum jeppum og í alls kyns færð og allskonar vegum, og hef oft verið inni á hálendi.

Hvað er skemmtilegast við starf leiðsögumannsins að þínu mati?
Það er aldrei sami hópurinn, andinn og áhuginn í hópnum getur verið svo misjafn, og svo er veðrið og náttúran hér á Íslandi aldrei eins sem gerir hverja ferð nýja.

Er eitthvað sem hefur komið þér á óvart í starfinu?
Helst hvað ferðamenn eru heillaðir af landinu okkar.

Hvað úr náminu hefur nýst þér best í starfi?
Jarðfræðihlutinn og saga Íslands stendur upp úr hjá mér, kannski vegna þess að þar liggur minn áhugi helst.

Ert þú enn í sambandi við samnemendur þína?
Já, við hittumst stundum allur hópurinn og svo er ég í góðu sambandi við talsvert marga í hópnum. Við erum býsna mörg úr þessum hóp sem höfum farið í að starfa við leiðsögn. Þess má geta að þessi nemendahópur var einstaklega vel saman settur og með skemmtilegri nemendahópum sem ég hef tilheyrt á ævinni, hef ég þó tilheyrt mjög mörgum enda eilífðarstúdent í eðli mínu.

Hver er þinn uppáhaldsstaður á Íslandi og hvað er það sem gerir hann sérstakan?
Það koma margir til greina en ég vel Þórsmörk. Það sem gerir þær ferðir svo sérstakar er að þurfa að keyra yfir jökulár á leiðinni og stórbrotin náttúran opnast meir og meir eftir því sem innar dregur. Þessi dalur er einstakur, kúrandi milli tveggja jökla, með birkiskógum og hráu landslagi. Og útsýnið af Valahnúk er alltaf dásamlegt, alveg sama hversu oft maður kemur þar upp. 

Hvað finnst þér vekja mestan áhuga hjá erlendum ferðamönnum á Íslandi?
Hvað náttúran okkar er ósnortin. Það eru svo margir sem tala um það og finnst við bera virðingu fyrir náttúrunni. Við verðum að halda í það, efla virðingu okkar enn meir ef eitthvað er því ósnortin náttúra Íslands er okkar mesti fjársjóður.

Getur þú sagt í nokkrum setningum hvað einkennir líf leiðsögumannsins?
Fjölbreytni, ferðalög og fólk. Hafirðu gaman af að ferðast og vera með fólki og ert þar að auki góður í að lesa í fólk þá áttu allskostar við þetta starf. Svo er gott að vera útsjónarsamur því ýmislegt getur komið upp á og sumt óvænt. 

Það er mikil eftirspurn eftir faglærðum leiðsögumönnum. Ef þig dreymir um að verða leiðsögumaður þá er enn tækifæri til að slást í hópinn sem hefur nám í haust. Nánari upplýsingar hér:

 

0