Arkitektúr á Íslandi í 300 ár - hönnun, menning og pólitík

Verð snemmskráning 32.900 kr Almennt verð 36.200 kr

Arkitektúr á Íslandi í 300 ár - hönnun, menning og pólitík

Verð snemmskráning 32.900 kr Almennt verð 36.200 kr
Prenta
FULLBÓKAÐ. Biðlisti í síma 525 4444.
Nýtt
Snemmskráning til og með 11. október
Mán. 21. okt. og fim. 24. okt. kl. 16:30 - 19:00
Óskar Örn Arnórsson, arkitekt og doktorsnemi í sögu arkitektúrs við Columbia-háskóla
Endurmenntun, Dunhaga 7.

Á þessu stutta námskeiði verður sögð saga arkitektúrs á Íslandi frá upplýsingu til nútíma í tveimur fyrirlestrum. Sá fyrri tekur fyrir tímabilið frá 1752-1919, sem markast af byggingu Viðeyjarstofu fram að útskrift Guðjóns Samúelssonar úr Konunglegu listaakademíunni í Kaupmannahöfn. Sá seinni fjallar um tímabilið frá 1919-2019—steinsteypuklassík og fúnksjónalisma (1919-1944), síðmódernisma (1944-1968), póstmódernisma (1968-2008) og það sem mætti kalla arkitektúr síðkapítalisma.

Skoðaðar verða einstaka byggingar og þær tengdar við alþjóðlega samtímastrauma í arkitektúr, listum, bókmenntum og heimspeki. Þær verða meðal annars skoðaðar út frá pólitík, hagfræði, kynjafræði, nýlendustefnu og stöðu Íslands í alþjóðlegu samhengi. Ekki verður fjallað mikið um arkitekta og þeirra tilætlanir, þótt þeir komi vissulega við sögu, heldur hvernig arkitektúr hefur átt þátt í að móta samfélagið og einstaklinga innan þess og skilgreint það sem er mögulegt og ómögulegt hverju sinni.

Í hvorum fyrirlestri fyrir sig verður einblínt á u.þ.b. sex byggingar sem eiga það sameiginlegt að fanga tíðarandann hverju sinni. Hugmyndin er því ekki að spyrja hvernig arkitektúrinn lítur út, heldur hverju er verið að reyna að ná fram með að láta hann líta svona út—þ.e. hvað arkitektúrinn gerir. Til hvers eru kölluð fram hughrif eins og gagnsæi, hlýleiki, þyngd, léttleiki, heiðarleiki, einfaldleiki, fjölbreytileiki?

Á námskeiðinu er ekki ætlunin að fjalla um hvernig arkitektar eiga að byggja, hvað á að varðveita, o.s.frv., heldur þvert á móti, að koma með vægðarlausa gagnrýni á allt sem er arkitektum kærast; hvort sem það eru ástælir arkitektar og byggingar þeirra, arkitektúr í heild sinni eða Ísland sjálft sem líta má á sem heilsteyptasta manngerða umhverfi jarðarkringlunnar. Arkitektar eiga þátt í hafa hannað það sem nú er kallað mannöld og nú er komið að því að hanna sig út úr henni!

Á námskeiðinu er fjallað um:

• Arkitektúr í tengslum við mótun mannsins. Til dæmis hvernig búningsklefar í íslenskum sundlaugum ýta undir „normalíseringu“ gagnkynhneigðar og fleiri dæmi tekin.
• Sögu arkitektúrs í samhengi við aðra sögulega viðburði—arkitektúr sem spegill samtímans um leið og hann á þátt í að skapa þennan sama samtíma.
• Þátttöku arkitektúrs í að skapa ýmis hugtakapör sem stýra því hvernig við hugsum:
borg/sveit, þjóðlegt/alþjóðlegt, hefð/nútími.
• Sagnfræði arkitektúrs.

Ávinningur þinn:

• Þú lærir að þekkja helstu strauma og stefnur í arkitektúr síðustu tveggja alda, bæði á Íslandi og annars staðar, út frá útlitseinkennum og hugmyndafræðina að baki þeirra.
• Þú lærir að spyrja gagnrýninna spurninga um þátt arkitektúrs í mótun hins manngerða umhverfis á mismunandi tímum.
• Þú öðlast betri þekkingu á sögu þess hvernig arkitektar hafa beint veruleikanum á ákveðnar brautir í gegnum hið manngerða umhverfi. Þessi þekking mun nýtast þér í daglegum störfum en líka gefa þér verkfæri til að veita viðnám.

Fyrir hverja:

Arkitektar sem vilja kynna sér nýja strauma og stefnur í sagnfræði arkitektúrs og aðrir sem koma að gerð hins manngerða umhverfis, s.s. byggingatæknifræðingar, verkfræðingar, innanhúshönnuðir, skipulagsfræðingar og landslagsarkitektar. Einnig er hugsanlegt að sagnfræðingar, listfræðingar og listamenn muni hafa ánægju af námskeiðinu sem og áhugafólk um arkitektúr.

Kennsla:

Óskar Örn Arnórsson er arkitekt og doktorsnemi í sögu arkitektúrs við Columbia-háskóla, meira og minna búsettur í New York síðan 2006. Hann lauk B.Arch. námi frá Arkitektaskólanum í Kaupmannahöfn 2006 og Cooper Union 2008, starfaði sem arkitekt í New York fyrir Situ Studio 2007-2009, Diller Scofidio + Renfro frá 2009-2012 og fyrir PK Arkitekta í Reykjavík árið 2013. Hann lauk MSc námi í Critical, Curatorial and Conceptual Practices in Architecture (MsCCCP) árið 2015, þar sem hann vann lokaverkefni sitt um höfuðstöðvar Sameinuðu þjóðanna. Doktorsritgerð hans í sögu arkitektúrs við sama háskóla, sem hann stefnir á að ljúka árið 2021, fjallar um Marshallaðstoðina í Grikklandi, Þýskalandi og Frakklandi.

Aðrar upplýsingar:

Þar sem tíminn er naumur munu þátttakendur fá í hendur lesefni sem ætlast er til að þeir kynni sér fyrir námskeiðið. Þeir munu einnig fá bóka- og greinalista sem gefur yfirsýn yfir heimildir sem kennari notar við undirbúninginn og geta þátttakendur lesið efnið sér til fróðleiks, annað hvort fyrir eða eftir að námskeiðinu lýkur. Margt af heimildunum er á ensku.

0