Atómstöðin - endurlit í Þjóðleikhúsinu

Verð snemmskráning 18.800 kr Almennt verð 20.700 kr

Atómstöðin - endurlit í Þjóðleikhúsinu

Verð snemmskráning 18.800 kr Almennt verð 20.700 kr
Prenta
Nýtt
Snemmskráning til og með 28. september
Þri. 8. og 15. okt. kl. 19:30 - 21:30: EHÍ, Dunhaga 7.
Þri. 22. og fim. 31. okt.: Þjóðleikhúsið.
Halldór Laxness Halldórsson leikgerðarhöfundur, Una Þorleifsdóttir leikstjóri, Gréta Kristín Ómarsdóttir dramatúrg. Umsjón með námskeiðinu hafa þær Melkorka Tekla Ólafsdóttir, leiklistarráðunautur Þjóðleikhússins og Gréta Kristín Ómarsdóttir dramatúrg sýningarinnar.
Endurmenntun, Dunhaga 7 og í Borgarleikhúsinu Hverfisgötu 19

Í samstarfi við Þjóðleikhúsið

Í tengslum við sýningu Þjóðleikhússins á Atómstöðinni - endurliti, leiksýningu byggðri á skáldsögu eftir Halldór Laxness mun Endurmenntun HÍ efna til námskeiðs um verkið og uppsetninguna, í samvinnu við leikhúsið. Í þessari leiksýningu skoðar ný kynslóð leikhúslistafólks verkið í sögulegu samhengi og skapar krassandi og ögrandi sýningu, fulla af húmor.

Skáldsaga Nóbelskáldsins Halldórs Laxness, Atómstöðin, var afar umdeild þegar hún kom út árið 1948, enda fjallaði hún um mikið hitamál í íslensku samfélagi, herstöðvarmálið, sem snerist um „sölu landsins" eða „þátttöku þjóðarinnar í vestrænu varnarsamstarfi", eftir því hvar fólk skipaði sér í fylkingar. Verkið er þó ekki síður ástarsaga Uglu, bóndadóttur að norðan sem kemur til Reykjavíkur til að læra á orgel, og Búa Árlands, þingmanns og heildsala.
Atómstöðin – endurlit er nýtt leikverk eftir Halldór Laxness Halldórsson, unnið í samvinnu við Unu Þorleifsdóttur leikstjóra, þar sem þau nálgast skáldsögu Halldórs Laxness á ferskan og óvæntan hátt. Brugðið er nýju ljósi á umrót eftirstríðsáranna þar sem þjóð í litlu landi, mitt á milli Washington og Moskvu, stóð frammi fyrir stórum spurningum um framtíð sína. Í brennidepli í verkinu eru þjóðernisvitund og sjálfsmynd, tengsl litlu eyþjóðarinnar við umheiminn og hin eilífu átök auðstéttar og alþýðu.
Á námskeiðinu mun Haukur Ingvarsson fjalla um skáldsögu Laxness Atómstöðina. Halldór Laxness Halldórsson og Una Þorleifsdóttir munu kynna aðferðir sínar og nálgun við verkið. Áhorfendur koma í heimsókn á æfingu í Þjóðleikhúsinu og taka þátt í umræðum undir stjórn Grétu Kristínar Ómarsdóttur. Þeir sjá forsýningu í Þjóðleikhúsinu og taka þátt í stuttum umræðum með þátttöku listamanna á eftir.

Miði á forsýningu er innifalinn í námskeiðsgjaldi.

Dagskrá námskeiðsins
Þriðjudagskvöldið 8. október kl.19:30 - 21:30.
Haukur Ingvarsson fjallar um skáldsögu Laxness, Atómstöðina í Endurmenntun HÍ.

Þriðjudagskvöldið 15. október kl. 19:30 - 21:30.
Halldór Laxness Halldórsson leikgerðarhöfundur og Una Þorleifsdóttir leikstjóri kynna nálgun sína við verkið í EHÍ.

Þriðjudagskvöldið 22. október kl. 19:30 - 21:30.
Heimsókn á æfingu í Þjóðleikhúsinu og umræður. Umsjón: Gréta Kristín Ómarsdóttir dramatúrg.

Fimmtudagskvöldið 31. október kl. 19:30.
Forsýning í Þjóðleikhúsinu og stuttar umræður með þátttöku listamanna á eftir.

Kennsla:

Halldór Laxness Halldórsson hefur getið sér gott orð sem uppistandari, handritshöfundur og ljóðskáld, en skrifar nú í fyrsta sinn leikverk fyrir Þjóðleikhúsið.

Meðal leikstjórnarverkefna Unu Þorleifsdóttur eru Dúkkuheimili 2. hluti, Konan við 1000°, Óvinur fólksins, Tímaþjófurinn og Gott fólk, en hún hlaut Grímuverðlaunin fyrir síðastnefndu sýninguna.

Haukur Ingvarsson, bókmenntafræðingur og rithöfundur, hefur meðal annars sent frá sér bókina Andlitsdrættir samtíðarinnar: Síðustu skáldsögur Halldórs Laxness.

0