Jökla- og loftslagsbreytingar á Íslandi

Verð snemmskráning 13.900 kr Almennt verð 15.300 kr
Prenta
Nýtt
Snemmskráning til og með 5. mars
Fim. 15. og mán. 19. mars kl. 19:30 - 21:30
Hrafnhildur Hannesdóttir doktor í jarðvísindum frá Háskóla Íslands
Endurmenntun, Dunhaga 7.

Í samstarfi við Félag leiðsögumanna

Athugið! Þetta námskeið er aðeins ætlað leiðsögumönnum í Félagi leiðsögumanna.

Á námskeiðinu verður farið yfir þær breytingar sem hafa orðið á jöklum landsins vegna hlýnandi loftslags og fjallað um hvaða þættir hafa mest áhrif á vöxt og viðgang þeirra.

Jöklar á Íslandi hafa verið á hröðu undanhaldi frá því fyrir lok 20. aldar en þeir bregðast hins vegar ekki allir eins við loftslagsbreytingum. Tekin verða dæmi um sögu jöklabreytinga við sunnanverðan Vatnajökul sem og frá öðrum vinsælum jökulsporðum í alfaraleið.

Jöklar á Íslandi bregðast hratt við breytingum í loftslagi og auðvelt aðgengi að þeim veitir einstakt tækifæri til þess að skoða tengsl jökla- og loftslagsbreytinga. Rætt verður um þróun jöklanna allt frá því á Litlu ísöld (1450-1900), en á því kuldaskeiði náðu margir jöklar mestri útbreiðslu á síðastliðnum 10.000 árum.

Jöklar á Íslandi eins og víðast hvar annars staðar í heiminum hopa hratt og þynnast og afleiðingar loftslagsbreytinga eru mjög sýnilegar. Viðbrögð jökla við breytingum í loftslagi eru mismunandi eftir stærð þeirra og lögun, en flestir jöklar svara innan nokkurra ára með breytingum á stöðu jökulsporðsins. Aukning gróðurhúsalofttegunda sem valda hlýnun andrúmsloftsins er að langmestu leyti af mannavöldum.

Fjallað verður um áhrif jöklabreytinga á nærumhverfið svo sem skriðuföll og myndun jökullóna, breytingar árfarvega, einnig landris, hækkun sjávarborðs, aukna tíðni eldgosa sem og framtíðarhorfur jöklannna. Dæmi verða tekin frá nokkrum jöklum sem liggja í alfaraleið og áhersla lögð á þá jökla sem hafa verið rannsakaðir sérstaklega með tilliti til loftslagsbreytinga.

Á námskeiðinu er fjallað um:

• Breytingar jökla á Íslandi frá lokum 19. aldar til dagsins í dag.
• Hvað það er sem hefur áhrif á framgang og hörfun jöklanna.
• Umhverfisbreytingar í kjölfar jökulhörfunar; landris, hækkun sjávarborðs, myndun lóna o.fl.
• Sérstaklega fjallað um þá jökla þar sem saga jöklabreytinga hefur verið skoðuð nákvæmlega og jöklalíkön notuð til þess að spá fyrir um framtíð þeirra.

Ávinningur þinn:

• Þátttakendur fá upplýsingar um hversu hratt og mikið jöklarnir hafa hopað og þynnst og sumir hverjir horfið.
• Þátttakendur fá gögn í hendurnar sem gera þeim kleift að svara aðkallandi spurningum um helstu umhverfisógn samtímans.
• Tekin verða dæmi um jökla sem gjarnan eru heimsóttir og eru vinsælir áningarstaðir, svo sem þeir skriðjöklar sem liggja steinsnar frá þjóðvegi 1.
• Þátttakendur fá yfirsýn yfir algengustu hugtök innan jökla- og loftslagsfræða og hvaða aðferðum er beitt til þess að mæla jöklana.

Fyrir hverja:

Námskeiðið er ætlað aðilum að Félagi leiðsögumanna.

Kennsla:

Hrafnhildur Hannesdóttir er með doktorspróf í jarðvísindum frá Háskóla Íslands. Doktorsverkefnið fjallaði um breytingar á sunnanverðum Vatnajökli í fortíð, nútíð og framtíð. Hún hefur haldið fjölmörg erindi og kynnt niðurstöður verkefnisins á ýmsum vettvangi, ásamt því að vinna að gerð fræðsluefnis um loftslags- og jöklabreytingar.

0