UPPLÝSINGAR UM ÁHRIF COVID-19 Á STARFSEMI EHÍ

Í samstarfi við Þjóðleikhúsið

Þjóðleikhúsið hefur nú sýningar á einleiknum Vertu úlfur. Verkið er byggt á bók Héðins Unnsteinssonar sem vakti verðskuldaða athygli og var tilnefnd til Íslensku bókmenntaverðlaunanna. Fjallað er hispurslaust um baráttuna við geðsjúkdóma út frá sjónarhóli manns sem í senn glímir við geðraskanir og starfar innan stjórnsýslunnar á sviði geðheilbrigðismála. Þetta er nærgöngul, ögrandi og "sturluð" sýning og bjóða
Þjóðleikhúsið og Endurmenntun upp á námskeið um verkið og uppsetninguna.

Miði á leiksýningu er innifalinn í námskeiðsgjaldi. Þátttakendum býðst að kaupa aukamiða á afsláttarkjörum.
Athugið að uppsetningin er sérstaklega sniðin að gildandi samkomutakmörkunum.

Vertu úlfur! hrífur okkur með í brjálæðislegt ferðalag um hættulega staði hugans inn í veröld stjórnleysis og örvæntingar og aftur til baka. Við fáum innsýn í baráttu manns sem tekst að brjótast út úr vítahringnum og nær að snúa sinni skelfilegustu reynslu upp í þann styrk sem þarf til að breyta öllu kerfinu.

Leikgerð Unnar Aspar Stefánsdóttur, leikstjóra sýningarinnar, er byggð á nýlegri sjálfsævisögulegri frásögn Héðins Unnsteinssonar Vertu úlfur. Aðstandendur leiksýningarinnar hafa einnig leitað fanga í öðrum verkum eftir Héðin, og má þar nefna ýmsar blaðagreinar hans, svo sem greinina “Andrúmsloft á geðdeildum”, ljóð, fyrirlestra og viðtöl.

Bókin Vertu úlfur: wargus esto kom út árið 2015 og vakti mikla athygli. Þar fjallar Héðinn Unnsteinsson á opinskáan hátt um baráttu sína við geðrænar áskoranir eftir að hafa greinst með geðhvörf sem ungur maður. Héðinn rekur þar sögu sína; baráttumannsins sem tekst að brjótast út úr vítahringnum og nær að snúa sinni skelfilegustu reynslu upp í þann styrk sem þarf til að breyta kerfinu. Héðinn hefur um árabil starfað við stefnumótunarmál í geðheilbrigðismálum og er í dag formaður Geðhjálpar.

Dagskrá námskeiðs:

• Fyrirlestrarkvöld miðvikudaginn 24. febrúar kl. 20:00 - 22:00. Fyrirlesarar eru þau Héðinn Unnsteinsson og Unnur Ösp Stefánsdóttir.

• Leiksýning í Þjóðleikhúsinu föstudaginn 26. febrúar kl. 20:00.
Umræður með þátttöku listrænna aðstandenda sýningarinnar í lokin.

Frekari upplýsingar um sýninguna má sjá HÉR

Aðrar upplýsingar:

Fyrirvari
Ef óviðráðanlegar aðstæður, s.s. sóttvarnarreglur, koma í veg fyrir að hefðbundin kennsla geti farið fram í húsnæði Endurmenntunar á auglýstum námskeiðstíma verður brugðist við með því að:
A – færa námskeiðið og kynna skráðum þátttakendum nýjar dagsetningar með eins góðum fyrirvara og unnt er,
eða
B – kenna námskeiðið sem fjarnámskeið í gegnum ZOOM á áður auglýstum tíma.

Komi til ofangreindra breytinga fá skráðir þátttakendur allar nauðsynlegar upplýsingar sendar í tölvupósti og geta þeir þá tekið ákvörðun um skráningu sína í ljósi breyttra forsenda.

Styrkur
Átt þú rétt á styrk frá þínu stéttarfélagi eða Vinnumálastofnun til að sækja námskeið eða nám?
Kannaðu málið HÉR.