Upprifjunarnámskeið í stærðfræði fyrir nýnema á Verkfræði- og náttúruvísindasviði

Verð 0 kr

Upprifjunarnámskeið í stærðfræði fyrir nýnema á Verkfræði- og náttúruvísindasviði

Verð 0 kr
Prenta
Kennsla hefst fim. 6. ágúst kl. 16:30. Kennt er 6., 7., 11., 12., 13. og 14. ágúst kl. 16:30 - 19:30. Kennt er 17. og 18. ágúst kl. 16:30 - 20:00 (8x).
Kennari er Eggert Karl Hafsteinsson, BS í hagnýtri stærðfræði. Aðstoðarkennari er Hulda Hvönn Kristinsdóttir, BS í stærðfræði og MS í menntun framhaldsskólakennara. Umsjón með námskeiðinu hefur Benedikt Magnússon, lektor.
Endurmenntun, Dunhaga 7.

UPPLÝSINGAR UM ÁHRIF COVID-19 Á STARFSEMI EHÍ

Í samstarfi við Raunvísindadeild Háskóla Íslands

SUMARÚRRÆÐI STJÓRNVALDA

Námskeiðinu er ætlað að rifja upp þá stærðfræði sem er nauðsynleg til að geta tekist á við stærðfræðinám á Verkfræði- og náttúruvísindasviði.
Kennsluaðferðir námskeiðsins byggjast á rannsóknum í kennslufræði og verður farið stuttlega í valdar niðurstöður sem gætu gagnast nemendum í námi.

Rannsóknir hafa sýnt að líklegra er að nemendur nái tilætluðum árangri ef þeir stunda stærðfræði sjálfir frekar en að hlusta einungis á fyrirlestra.
Kennslan verður því tvískipt. Nemendur vinna saman í litlum hópum við að leysa dæmi og kenna hver öðrum meðan kennarinn gengur á milli og aðstoðar en einstaka sinnum verður kennari með stutta fyrirlestra um hugtök eða tekur sýnidæmi. Þetta ferli verður endurtekið nokkrum sinnum hvern dag námskeiðsins.
Ætlast er til að nemendur taki virkan þátt en þar með fá þeir þjálfun í þeim aðferðum sem eru notaðar í stærðfræði og að tjá sig um stærðfræði og kynnast fólki sem þeir geta unnið með á komandi hausti. Tiltölulega lítill tími gefst fyrir hvert efnisatriði og verða nemendur því hvattir til að vinna heima. Óski nemandi eftir meiri þjálfun er hægt að benda honum á fleiri æfingar og námsefni, þó aðallega á ensku.

Stuðst verður við opið kennsluefni í stærðfræði sem Háskóli Íslands hefur unnið að undanfarin ár og má finna hér. Athugið að ekki verður farið í allt efnið sem þar er að finna, þar sem sum atriði verða kennd frá grunni í námskeiðunum sem nemendur eru á leið í.
Til að bregðast við þörfum nemenda verður námsefnið á síðasta degi námskeiðsins ákveðið í samvinnu við nemendur.
Lokamarkmið námskeiðsins eru að nemendur hafi rifjað upp helstu atriði í námi næstkomandi hausts og séu færir um að rifja upp sama efni seinna. Einnig er vonast til að nemendur geti nýtt sér tengslanetið sem þeir mynda við samnemendur til að aðstoða hver annan á komandi önn.

Á námskeiðinu er fjallað um:

• Almenn brot.
• Jöfnur og ójöfnur.
• Mengi.
• Föll og hugtök tengd þeim.
• Margliður.
• Rætur.
• Logra.
• Þríhyrninga.
• Hornaföll og einingahringinn.

Ávinningur þinn:

• Góður undirbúningur fyrir nám á háskólastigi.
• Tengslanet við samnemendur.
• Kemur heilanum í gang eftir sumarið.

Fyrir hverja:

Námskeiðið hentar vel nemendum sem hefur ekki gengið frábærlega í stærðfræði eða nemendum sem ekki hafa komið að stærðfræði lengi. Námskeiðið hentar þó einnig nemendum sem eru að koma úr framhaldsskóla og þurfa á upprifjun að halda.

Kennsla:

Eggert Karl Hafsteinsson er stærðfræðingur og tölvunarfræðingur. Hann hefur kennt fjölmörg stærðfræðinámskeið á Verkfræði- og náttúruvísindasviði Háskóla Íslands, bæði í aðstoðarhlutverki og sem umsjónarkennari. Hann hefur einnig kennt styttri námskeið á borð við prófbúðir eða almenn undirbúningsnámskeið og hefur starfað sem einkakennari í um 10 ár. Þar að auki hefur hann starfað þrjú sumur við gerð á rafrænu stærðfræðikennsluefni.

Aðrar upplýsingar:

Ef til vill gætu nemendur viljað glugga í rafræna námsefnið meðan þeir vinna í verkefnum en þá gæti verið gott að hafa síma, iPad eða álíka.
Einnig gæti verið gagnlegt að hafa blað og skriffæri til að skrifa minnispunkta.

SUMARÚRRÆÐI STJÓRNVALDA

Mat þátttakenda

á mælikvarðanum 1 til 5
(5,00)

Umsagnir

Kennslan var greinargóð og kennari hjálplegur, námsgögn góð.
Maður fékk tækifæri á að reikna sjálfur og reyna við dæmi á mismunandi stigum. Með þeim hætti færðu betri tilfinningu fyrir efninu í stað þess að fylgjast einungis með kennara leysa dæmi og glósa.
Mér fannst kennsluaðferðin nýstárleg og góð. Miklu betra að fá tækifæri til að leysa úr dæmum í hóp í stað þess að sitja og glósa.
0