Fréttir

Brautskráning kandídata 14. júní 2019

Brautskráning kandídata 14. júní 2019

Brautskráning kandídata frá ENDURMENNTUN HÍ fór fram við hátíðlega athöfn í Háskólabíó föstudaginn 14. júní 2019. Að þessu sinni voru brautskráðir 141 kandídat af fimm námsbrautum, Jákvæðri sálfræði - diplómanámi á meistarastigi, Leiðsögunámi á háskólastigi, námi til löggildingar fasteigna- og skipasala, Sálgæslu - diplómanámi á meistarastigi og Sérnámi í hugrænni atferlismeðferð.

Tveir leiðsögumenn útskrifaðir á táknmáli

Í fyrsta sinn var athöfnin túlkuð á táknmáli og er starfsfólk EHÍ afar stolt af því að útskrifa tvo leiðsögumenn sem eru með táknmál sem þeirra kjörtungumál. Öll kennsla í Leiðsögunáminu í vetur var túlkuð á táknmáli og nú getum við tekið á móti ferðamönnum og veitt leiðsögn um landið á táknmáli

Ný tækifæri og nýir möguleikar

Kristín Jónsdóttir Njarðvík, endurmenntunarstjóri, flutti ávarp við upphaf athafnarinnar og þakkaði samleiðina með útskriftarnemum. ENDURMENNTUN HÍ hefur afgerandi forystu á sviði símenntunar á Íslandi. Fólk fær tækifæri til að efla sig í starfi, ná meiri árangri í því sem það er að gera, halda inn á ný svið og kynnast því sem aðrir eru að fást við í sínu starfi.

Hátíðarræðu flutti Arnfríður Guðmundsdóttir, prófessor við Guðfræði- og trúarbragðafræðideild HÍ. Í máli hennar kom meðal annars fram að í ákveðnum skilningi sé útskrift endapunktur en hún sé einnig upphafið að einhverju nýju. Námið sem fólk hefur lagt stund á opnar ný tækifæri og möguleika.

Magnús Friðrik Ólafsson, kandídat úr Sérnámi í hugrænni atferlismeðferð, flutti ávarp fyrir hönd nemenda. Hann sagði áheyrendum frá ferðalagi sínu í gegnum námið sem hann og eiginkona hans fóru samferða í gegnum ásamt því að eignast barn á meðan á ferðalaginu stóð.

Þakkir

Við óskum útskriftarnemendum okkar innilega til hamingju með áfangann og þökkum fyrir samleiðina undanfarin misseri.

Á Facebook síðunni okkar má sjá fjölda skemmtilegra mynda frá brautskráningunni

0