Viðbrögð Endurmenntunar Háskóla Íslands við takmörkunum á samkomum

Í ljósi gildandi takmarkana á skólastarfi vegna farsóttar sem gilda til 30. apríl 2021 er skólastarf heimilt að því tilskildu að einstaklingar geti haft minnst 1M fjarlægð á milli sín og fjöldi aðila í hverri kennslustofu fari ekki yfir 150.

Heimilt er að nota sömu innganga og sameiginleg rými þar sem ekki er höfð löng dvöl og andlitsgrímur eru notaðar. Blöndun nemenda milli hópa er heimil í kennslu og er starfsfólki heimilt að fara á milli hópa, en þurfa að gæta að sóttvörnum. Í sameiginlegum rýmum skóla, svo sem við innganga, í anddyri, á salerni og göngum, er heimilt að víkja frá fjöldatakmörkun og reglu um blöndun hópa að því gefnu að notaðar séu andlitsgrímur.

Til að tryggja öryggi allra er nú skylt að nota hlífðargrímur í öllum rýmum utan kennslustofa í byggingu Endurmenntunar. Grímur eru aðgengilegar fyrir alla að kostnaðarlausu við inngang eða á þjónustuborði.

Mikilvægt er að viðskiptavinir, kennarar og starfsfólk haldi sig heima ef veikinda verður vart. 

Fyrirvari um námskeið:

Ef óviðráðanlegar aðstæður, s.s. sóttvarnarreglur, koma í veg fyrir að hefðbundin kennsla geti farið fram í húsnæði Endurmenntunar á auglýstum námskeiðstíma verður brugðist við með því að:

A – færa námskeiðið og kynna skráðum þátttakendum nýjar dagsetningar með eins góðum fyrirvara og unnt er,

eða

B – kenna námskeiðið sem fjarnámskeið í gegnum ZOOM á áður auglýstum tíma.

Komi til ofangreindra breytinga fá skráðir þátttakendur allar nauðsynlegar upplýsingar sendar í tölvupósti og geta þeir þá tekið ákvörðun um skráningu sína í ljósi breyttra forsenda.

Vakni upp spurningar vegna náms eða námskeiða er viðkomandi hvattur til að hafa samband við þjónustuborð Endurmenntunar með því að senda póst á netfangið endurmenntun@hi.is.

Hjá Endurmenntun er lögð áhersla á almennt hreinlæti og að gestir og starfsfólk hugi að persónulegum sóttvörnum þvoi hendur reglulega með sápu og vatni. Handsprittbrúsum hefur verið komið fyrir víða í húsakynnum EHÍ og eru allir hvattir til að nýta sér þá. Starfsfólk sótthreinsar stofur og almenna snertifleti reglulega.

Þessi síða verður áfram uppfærð með nýjustu upplýsingum eftir því hvernig málin þróast hverju sinni.

Þessi texti var síðast uppfærður 23. febrúar.

0