Góð reynsla af fjarnámskeiðum

Undanfarin misseri hefur Endurmenntun stóraukið úrval sitt af fjarnámskeiðum og það er ánægjulegt verkefni að geta miðlað fróðleik og kunnáttu víðsvegar um landið til stærri hóps þátttakenda. Fjarnámskeiðin hafa fallið í góðan jarðveg og ánægja þátttakenda er frábær hvatning til að halda áfram að þróa námsframboð Endurmenntunar frekar í þessa átt. Góð reynsla er komin á fyrirkomulag fjarnámskeiðanna og kennarar og starfsfólk er sífellt að bæta kunnáttu sína í hinum ýmsu atriðum sem tengjast fjartækninni. Endurmenntun hefur ávallt lagt áherslu á að veita persónulega og einstaklingsmiðaða þjónustu og á því er engin undantekning þegar kemur að fjarnámskeiðunum. Þátttakendur hafa greiðan aðgang að starfsfólki í þjónustu Endurmenntunar ef vangaveltur eða vandamál koma upp og fyrir utan örfáar undantekningar eru öll námskeiðin haldin í rauntíma þannig að þátttakendur geta tekið virkan þátt í umræðum við kennara. Við tryggjum skýr hljóð- og myndgæði með aðstoð tæknimanns sem fylgist með fjarkennslu námskeiðanna og upplifun þátttakenda er því með hinu allra besta móti. Það er mikilvægt að fagna þegar vel gengur og hér höfum við tekið saman nokkur ummæli frá ánægðum þátttakendum sem gleðja og hvetja okkur til að halda áfram okkar góða starfi.