Nám­skeið og próf til leyf­is til að gera merkjalýs­ing­ar

Í samstarfi við Húsnæðis-, mannvirkja-, og skipulagsstofnun er haldið nám fyrir þau sem stefna á að sækja um leyfi til að gera merkjalýsingar.

Prófskírteini verða veitt þeim sem hafa lokið námskeiðinu með lágmarki 7,0 í einkunn.

Námskeiðið byggir á reglugerð nr. 160/2024 um merki fasteigna.

Umsóknarfrestur í Námskeið og próf til leyfis til að gera merkjalýsingar er til og með 29. apríl nk.

Námskeið og próf til leyfis til að gera merkjalýsingarskiptist í tvo hluta:

A: Framkvæmd landmælinga við gerð merkjalýsingaB: Uppsetning og gerð merkjalýsinga

A: Framkvæmd landmælinga við gerð merkjalýsinga

A-hluti námsins fjallar um tæknilega framkvæmd landmælinga sem notaðar eru við gerð merkjalýsinga fasteigna. Lögð er áhersla á nákvæmni mælinga, val á mæliaðferðum og tækjum, meðhöndlun gagna og skilvirka úrvinnslu mæligagna. Nemendur kynnast verklagi frá undirbúningi og mælingu á vettvangi til frágangs mæligagna fyrir notkun í merkjalýsingum og kortagerð.

Að loknum A-hluta skal nemandi:

• Þekkja og geta framkvæmt landmælingu samkvæmt kröfum laga og reglugerða.
• Hafa grunnskilning á hnitakerfum, viðmiðunum og hnitaformum sem notuð eru við landmælingar.
• Þekkja þær áskoranir sem eru í landmælingum á Íslandi.
• Hafa grunnþekkingu á hvernig GNSS mælingar virka.
• Hafa þekkingu á mismunandi mæliaðferðum með GNSS tækni.
• Hafa þekkingu á einföldum hornamæliaðferðum í landmælingum.
• Vita hverskonar mælibúnaður hentar við mælingar hverju sinni.
• Vita hvernig framkvæma eigi GNSS mælingar með nægilegri nákvæmni.
• Vita hvernig gengið er frá niðurstöðum mælinga inní merkjalýsingu.
• Hafa þekkingu á hverskonar fjarkönnunargögn hægt sé að nota við ákvörðun á landa og lóðamerkjum.
• Vita hvernig gengið er frá niðurstöðum úr hnitsetningu með fjarkönnunargögnum inní merkjalýsingu.

B: Uppsetning og gerð merkjalýsinga

B-hluti námsins er verklegt og hagnýtt námskeið í uppsetningu og gerð merkjalýsinga þar sem áherslan er ekki á almenna kynningu á lögum eða ferlum skráningar, heldur á beitingu þeirrar þekkingar við raunverulega gerð merkjalýsinga. Þar er unnið með uppsetningu merkjalýsingar, úrvinnslu mæligagna, notkun eldri og nýrra heimilda, framsetningu texta og uppdráttar, tengsl við skráningu fasteigna og faglegan rökstuðning fyrir niðurstöðu.

Forsendur þátttökuGert er ráð fyrir að þátttakendur:

• geti unnið sjálfstætt með landfræðileg gögn í GIS-umhverfi,
• hafi aðgang að fartölvu og nauðsynlegum hugbúnaði til verkefnavinnu,
• hafi aðgang að vefuppfletti fasteignaskrár.

Námskeiðið kennir ekki grunnnotkun GIS-forrita. Þátttakendur þurfa að geta opnað og unnið með landfræðileg gögn, lesið hnitsettar heimildir og sett fram einfaldan uppdrátt til notkunar í merkjalýsingu.