Við­burða­stjórn­un - frá hug­mynd til fram­kvæmd­ar

Hagnýtt og skapandi námskeið fyrir þau sem vilja tileinka sér verkfæri viðburðastjórnunar og skipuleggja viðburði af meira öryggi. Þátttakendur vinna í sameiningu raunhæft verkefni þar sem viðburður er skipulagður frá A til Ö og nýtt eru nauðsynleg tól viðburðastjórnunar, svo sem áhættugreining, afmörkun umfangs, kynningarmál, áætlanagerð, verkaskipting, endurmat og skjölun. Á þennan hátt gefst tækifæri til að tileinka sér hagnýt vinnubrögð og verkfæri viðburðastjórnunar.

Markmið námskeiðsins er að þátttakendur öðlist sjálfstraust til að takast á við skipulagningu viðburða og öðlist grundvallarskilning á verkfærakistu viðburðastjórans í gegnum reynslu af skipulagningu viðburðar. Sérstök áhersla er lögð á samstarf í litlum teymum, samskipti og verkaskiptingu. Í lok námskeiðs endurmeta þátttakendur viðburðinn og læra aðferðir við að skjala verkefnið svo lærdómur nýtist í næstu verkefnum.

Kennslan byggir á virkri þátttöku, skapandi aðferðum og reynslu kennara af raunverulegum, umfangsmiklum viðburðum. Engin reynsla af viðburðastjórnun er nauðsynleg, en þátttakendur þurfa að vera tilbúnir til að taka virkan þátt allt námskeiðið. Námskeiðið hentar jafnt þeim sem vilja ná aukinni færni við skipulagningu persónulegra viðburða sem og viðburða innan fyrirtækja, stofnana eða félagasamtaka.

Þátttakendur eru hvattir til að hafa með sér fartölvu. Athugið að námskeiðið felur í sér verklega framkvæmd viðburðar á námskeiðstíma.