Að gefa út bók - frá hug­mynd til les­enda

Dreymir þig um að gefa út bók en veist ekki hvernig þú ferð að? Bókaútgáfa blómstrar sem aldrei fyrr og þeim sem gefa út eigin verk fjölgar stöðugt enda tæknin orðin þannig að hver og einn getur stjórnað eigin útgáfu.

Að mörgu er að huga í útgáfu bóka. Farið verður yfir helstu þætti sem hafa þarf í huga í útgáfuferlinu, allt frá hönnun og umbroti og þar til bókin er komin í sölu og dreifingu. Verkþættir í bókaútgáfu eru fjölbreytilegir og krefjast ólíkrar þekkingar. Það skiptir miklu máli að leita til fagaðila og tryggja þannig gæði bókarinnar, því annars er stundum betur heima setið en af stað farið.

Til eru ýmsar leiðir til við fjármögnun útgáfu bókar og oft yfirsést höfundum þær. Þar má nefna ýmsa styrki s.s. hópfjármögnun, forsölu og fleira en einnig endurgreiðslu ríkisins og höfundaréttargreiðslur.

Þá skiptir miklu máli fyrir sjálfstæða höfunda að finna hagkvæmar lausnir á markaðnum og þeim fjölgar stöðugt með aukinni tækni og betra aðgengi að sérfræðingum og þjónustu hvar sem er í heiminum og ekki má gleyma gervigreindinni.

Svo er það sem skiptir öllu máli, hver ættu að kaupa bókina, hvers vegna ættu þau að kaupa hana og hvernig er hægt að finna hana?

Í framhaldi af námskeiðinu verður boðið upp á klukkustundar langa vinnustofu þar sem höfundum gefst tækifæri til að kynna verk sín, ræða áskoranir og fá sjónarhorn frá öðrum sem eru á svipaðri vegferð. Kennari námskeiðsins veitir þar jafnframt endurgjöf og hagnýt ráð sem miða að hverju verkefni og útgáfuferli þess. Vinnustofan er því ekki aðeins faglegur vettvangur heldur einnig samfélag höfunda sem vilja vaxa og styðja hvert annað á útgáfuferðalaginu.