Kyn­heil­brigði fatl­aðra: Fag­leg nálg­un í þjón­ustu

Á þessu námskeiði fær starfsfólk fræðslu og hagnýt verkfæri til að taka faglegar, virðingarfullar og opnar umræður við fatlað fólk um kynheilbrigði. Fatlað fólk hefur sama rétt og aðrir til kynlífs, sjálfsfróunar, nándar og sambanda. Þrátt fyrir það hefur umræðan oft verið tabú eða hreinlega gleymst í þjónustu og daglegu starfi. Afleiðingin getur verið skortur á fræðslu, óöryggi, skömm og rangar eða óraunhæfar hugmyndir um kynlíf og sambönd.

Námskeiðið byggir á mannréttindum fatlaðs fólks og hvernig starfsfólk getur skapað örugg rými þar sem einstaklingar fá fræðslu, stuðning og tækifæri til að læra um eigið kynheilbrigði. Lögð er áhersla á einfalt og rétt orðaval, að nota fræðileg heiti yfir líkams- og kynfæri, og að ræða málin á jafningjagrundvelli án þess að tala niður til fólks.

Einnig verður fjallað um mikilvægi einkarýmis, mörk, samþykki og hreinlæti. Sérstök áhersla er á hvernig starfsfólk getur komið í veg fyrir skömm, vanlíðan og óöryggi og í staðinn skapað traust, öryggi og heilbrigða umræðu.Að loknu námskeiði er starfsfólk betur í stakk búið til að ræða kynheilbrigði og hreinlæti sem eðlilegan hluta líkamsþroska, forðast fordóma og tabú, og styðja einstaklinga við að byggja upp jákvæða og virðingarfulla sjálfsmynd.

Námskeiðið er ætlað starfsfólki sem starfar með fötluðu fólki, t.d. í grunn- og framhaldsskólum, frístundastarfi, vinnu og virkni eða búsetuúrræðum. Engar forkröfur eru gerðar.