Heil­brigð mörk í starfi

Á þessu hagnýta námskeiði lærir þú að greina eigin mörk og tjá þau af festu og virðingu án þess að skerða góð samskipti og samstarf. Fjallað verður um mörk í starfi, hvaða hlutverki þau gegna og hvað getur gert okkur erfitt fyrir að setja þau. Þátttakendur skoða eigin viðbrögð og samskiptamynstur, hvað skiptir þá máli og við hvaða aðstæður reynir helst á mörkin.

Námskeiðið byggir á blöndu af fræðslu, umræðum og verklegum æfingum. Unnið verður með raunverulegar aðstæður úr eigin starfsumhverfi og þátttakendur undirbúa samtal eða næstu skref sem nýtast þeim í starfi.

Námskeiðið er ætlað starfsfólki, sérfræðingum og stjórnendum sem vilja efla færni sína við að setja skýr mörk í starfi og eiga árangursrík samskipti. Það hentar meðal annars þeim sem taka gjarnan á sig mikla ábyrgð eða vilja verða öruggari í að standa með eigin þörfum og sjónarmiðum. Engar forkröfur eru gerðar.

Ekki er þörf á sérstökum undirbúningi eða fartölvu. Þátttakendur eru þó hvattir til að hafa í huga raunverulegar aðstæður úr eigin starfsumhverfi þar sem þeir vilja setja skýrari mörk eða undirbúa samtal. Gert er ráð fyrir virkri þátttöku í umræðum og æfingum, en hver og einn ræður hversu miklu hann deilir með hópnum.