Laug­ar­dags­leið­ang­ur - Töfr­ar kvik­mynda­tón­list­ar

Tónlist gegnir veigamiklu hlutverki í kvikmyndum og á stóran þátt í þeim tilfinningalegu áhrifum sem áhorfendur upplifa. En hvað er það sem einkennir áhrifamikla kvikmyndatónlist? Hvernig getur mismunandi tónlist breytt upplifun, samhengi og jafnvel merkingu atriða?

Á þessu námskeiði verður farið í stuttan og skemmtilegan leiðangur um heim og sögu kvikmyndatónlistar, allt frá þöglum myndskeiðum frá 19. öld til Netflix-mynda dagsins í dag.

Fjallað verður um sögu, eðli og hlutverk kvikmyndatónlistar með aðstoð fjölda myndbrota og einnig skyggnst inn í starf kvikmyndatónskáldsins sjálfs. Þátttakendur fá að kynnast nokkrum af brautryðjendum greinarinnar og dýpka skilning sinn á þessari mikilvægu hlið kvikmyndanna.

Námskeiðaröðin Laugardagsleiðangur er ætluð ungmennum 10 ára og eldri í fylgd forráðamanna. Með hverri skráningu fullorðins fylgir aðgangur fyrir 1-2 ungmenni á aldrinum 10-17 ára. Athugið að námskeiðið er ekki ætlað börnum yngri en 10 ára. Vinsamlegast skráið í athugasemdareit við skráningu nöfn og fæðingarár ungmennanna sem koma með.