Til­finn­inga­vandi og DAM-nálg­un - fyrir fag­að­ila

Á námskeiðinu er fjallað um hvernig aðferðir díalektískrar atferlismeðferðar (DAM) nýtast í að efla tilfinningastjórn og bæta lífsgæði einstaklinga með alvarlegan tilfinningavanda. Tilfinningavandi getur m.a. birst í miklum tilfinningasveiflum, samskiptavanda, sjálfsskaða og sjálfsvígshegðun, truflun á sjálfsmynd og svart-hvítri hugsun. Leiðbeinendur á námskeiðinu eru meðferðaraðilar í DAM-teymi Landspítala.

Tilfinningavandi einkennist af alvarlegum tilfinningalegum óstöðugleika sem getur haft áhrif á öll svið lífsins og valdið mikilli þjáningu hjá einstaklingum sem hann hafa og fjölskyldum þeirra. Einstaklingar með tilfinningavanda búa við mikla þjáningu og mæta oft litlum skilningi í umhverfinu. Díalektísk atferlismeðferð (DAM) er gagnreynd meðferð við tilfinningavanda en á Landspítala er hún veitt af sérhæfðu meðferðarteymi á göngudeild lyndisraskana.

DAM-meðferð byggist á færniþjálfun, viðurkennandi samskiptum og núvitund. Á námskeiðinu verður fjallað um tilfinningavanda; einkennamynd, orsakir, þróun og rannsóknir. Helstu atriði og uppbygging DAM-meðferðar verður kynnt. Farið verður í grunnatriði viðurkennandi samskipta sem eru árangursrík í meðferð einstaklinga með tilfinningalegan óstöðugleika. Nokkur meðferðartæki sem geta nýst á breiðum grundvelli verða kynnt s.s. keðjugreining, streituþolsplön og færni í tilfinningastjórn.

Námskeiðið byggist á fyrirlestrum, umræðum og verklegum æfingum.

Þátttaka í námskeiðinu jafngildir ekki þjálfun sem þarf til að verða DAM-meðferðaraðili.

Námskeiðið er fyrir fagaðila í heilbrigðisþjónustu, félagsþjónustu eða skólum.