Tog­streitu­grein­ing - með gervi­greind

Markmið námskeiðsins er að efla hæfni þátttakenda til að beita skipulegri nálgun með stuðningi gervigreindar við greiningu og ákvarðanatöku gagnvart flóknum viðfangsefnum.

Á námskeiðinu er fjallað um hvernig á að leysa úr togstreitu. Togstreita milli gagnstæðra leiða til að ná sama markmiði grundvallast ávallt á óskýrleika í röklegum tengslum milli aðgerðar, tilgangs hennar og markmiðsins sem stefnt er að. Þessi togstreita er oft orsök þess að neikvæðar rótarorsakir sem leiða til óæskilegra afleiðinga verða viðvarandi. Þannig er togstreitugreiningin gjarna næsta skrefið þegar rökleg rótargreining hefur verið unnin. En togstreitugreiningu má einnig beita sjálfstætt til að leysa úr ágreiningi sem þegar er kominn fram á yfirborðið.

Á námskeiðinu leysa þátttakendur úr vandamálum með aðstoð togstreitugreiningar. Þátttakendur sem lokið hafa námskeiði um rótargreiningu og komist að rótarorsökum sem grundvallast á togstreitu leysa úr henni á námskeiðinu en aðrir þátttakendur mæta til leiks með eigið vandamál til að vinna úr. Hér getur hvort sem er verið um að ræða togstreitu á vinnustaðnum eða í persónulegu lífi.

Námskeiðið hefst á kynningu á togstreitugreiningunni. Að því loknu er unnið hópverkefni til að æfa beitinguna og nokkur dæmi um greiningar rakin. Að því loknu taka nemendur til við að leysa eigin viðfangsefni með aðstoð kennara og leiðbeinenda. Við beitum gervigreind til að aðstoða okkur við að vinna greiningarnar, betrumbæta orsakatengsl og benda á ómeðvitaðar fyrirframgefnar forsendur. Við skoðum einnig hvernig gervigreind getur nýst til að bæta ferla og auka skilvirkni.

Námskeiðið er ætlað stjórnendum og sérfræðingum í opinberum rekstri. Það er sérstaklega gagnlegt fyrir stofnanir sem eru að hefja innleiðingu gervigreindar því lögð er sérstök áhersla á áhrif hennar á skipulag, stjórnun og mönnun.