Ferða­þjón­usta og áhrif ferða­mennsku

Þetta námskeið er hluti af leiðsögunámi en opið öllum áhugasömum. Hægt er að taka námskeiðið með tvennum hætti: Án námsmats – fyrir þau sem vilja sækja námskeiðið sér til fróðleiks og skemmtunar. Með námsmati – fyrir þau sem vilja fá staðfest námskeið með námsárangri og geta þá nýtt það inn í leiðsögunám síðar.Þau sem hyggjast taka námskeiðið með námsmati þurfa að uppfylla inntökuskilyrði leiðsögunáms. Viðkomandi þurfa að hafa samband við Endurmenntun með því að senda tölvupóst á netfangið nemehi@hi.is.

Meginmarkmið námskeiðsins er að veita innsýn í þróun ferðamennsku og áhrif hennar á umhverfi, samfélag og efnahag, bæði á heimsvísu og á Íslandi. Fjallað er um helstu kenningar, lykilhugtök og hegðun ferðamanna, sem og umhverfisleg, samfélagsleg og efnahagsleg áhrif, þolmörk og sjálfbæra þróun. Einnig er tekið á náttúrusiðfræði, ábyrgri umgengni og grunnatriðum í rekstri og markaðssetningu ferðaþjónustu, þar á meðal hlutverki samfélagsmiðla.

Hæfniviðmið:

Við lok námskeiðsins getur nemandi:

• lýst þróun ferðamennsku og helstu hugtökum ferðamálafræða.
• útskýrt hegðun og væntingar ferðamanna í tengslum við upplifun og áfangastaði.
• lýst helstu áhrifum ferðamennsku á umhverfi, samfélag og efnahag.
• útskýrt hugtakið þolmörk áfangastaða og nefnt einfaldar aðgerðir sem styðja við sjálfbæra þróun.
• notað hugtök í náttúrusiðfræði til að lýsa umgengni og ábyrgð í ferðaþjónustu.
• útskýrt grunnatriði í stofnun, rekstri og markaðssetningu ferðaþjónustufyrirtækja.

Námskeiðið er skipulagt sem fjarnám með staðlotum. Kennt er á íslensku og námsmat fer einnig fram á íslensku. Í upphafi hvers námskeiðs er fjarfundur með kennara og upptökur af fyrirlestrum eru í kjölfarið gerðar aðgengilegar á kennslusvæði. Staðlota í námskeiðinu er: 30. janúar, kl. 9:00 - 16:00.